ಪ್ರಿತಿಯ ಮಕ್ಕಳೇ,
ಈ ವಾರ ಮಕ್ಕಳ ಸಂಪಿಗೆಯ ಅತಿಥಿ ಕಾರ್ಕಳದ ಲಕ್ಕಿ ಸನ್.
ಲಕ್ಕಿಸನ್ ಕಾರ್ಕಳದ ದೂಪದ ಕಟ್ಟೆಯ ಹುಡುಗ. ಅಪ್ಪ ಮೋಹನ್ ಅಮ್ಮನ್ನ ಮತ್ತು ಅಮ್ಮ ಐರಿಸ್ ಅಮ್ಮನ್ನ. ನಿಟ್ಟೆಯ ಸ್ಕೂಲಲ್ಲಿ ಐದನೆ ತರಗತಿ ಓದುತ್ತಿದ್ದ ಲಕ್ಕಿಸನ್, ನಾಲ್ಕನೆಯ ತರಗತಿಯವರೆಗೆ ಮು೦ಬಯಿಯಲ್ಲಿದ್ದ. ಚಿತ್ರ ಬಿಡಿಸುವುದರ ಜೊತೆಗೆ ಈತನಿಗೆ ಸ್ವಿಮ್ಮಿ೦ಗೂ, ಸ್ಕೇಟಿ೦ಗೂ ತುಂಬಾ ಇಷ್ಟ. ಎರಡರಲ್ಲೂ ಅನೇಕ ಬಹುಮಾನಗಳನ್ನು ಪಡೆದಿದ್ದಾನೆ.
ಹೀಗಿರುವ ಲಕ್ಕಿ, ಶಾಲೆಗೆ ರಜೆ ಸಿಕ್ಕಾಗ ಕತೆ ಓದುತ್ತಾ, ಚಿತ್ರ ಬಿಡಿಸುತ್ತಾ ಕಾಲಕಳೆಯುತ್ತಾನೆ.
ಲೈಬ್ರರಿಗೆ ಹೋಗೋದು, ಪುಸ್ತಕ ತರೋದು ಇವನಿಗೆ ಪ್ರೀತಿ. ಚಿತ್ರ ಬಿಡಿಸುವಾಗ ರಬ್ಬರ್ ಉಪಯೋಗಿಸದಿರುವುದು ಈ ಚಿಗುರು ಕಲಾವಿದನ ವಿಶೇಷ. ಪೆನ್ಸಿಲ್ ಶೇಡಿ೦ಗ್, ಬಣ್ಣ ಹಚ್ಚುವುದು ಎರಡರಲ್ಲೂ ಲಕ್ಕಿಸನ್ ಜಾಣ. ಅಧ್ಯಯನದಲ್ಲೂ ಮುಂದಿರಬೇಕು ಎನ್ನುವುದು ಲಕ್ಕಿಯ ಇಷ್ಟ, ಆದರೆ ಗಣಿತ ಮಾತ್ರ ಸ್ವಲ್ಪ ಕಷ್ಟ. ಇಲ್ಲಿರುವ ಧರ್ಮರಾಯನ ಚಿತ್ರವನ್ನು ಲಕ್ಕಿ ಅರ್ಧ ಗಂಟೆಯೊಳಗೆ ಬಿಡಿಸಿದ್ದು. ಲಕ್ಕಿಯ ಆರ್ಟ್ ಟೀಚರ್ ಇದನ್ನು ತುಂಬಾ ಮೆಚ್ಚಿಕೊಂಡಿದ್ದರಂತೆ.
ಲಕ್ಕಿಯ ನೋಟ್ ಬುಕ್ಗಳನ್ನು ನೋಡಿದರೆ ನೀವೂ ಇಷ್ಟಪಡುತ್ತೀರಿ. ಈತನದು ಮುದ್ದಾದ ಅಕ್ಷರಗಳು. ಅಷ್ಟೇ ಮುದ್ದಾಗಿ ಪೆನ್ನಿನಿಂದ ಚಿತ್ರ ಕೂಡ ಬಿಡಿಸುತ್ತಾನೆ. ಲಕ್ಕಿಯ ಚಿತ್ರಗಳು ನಿಮಗೆ ಇಷ್ಟವಾಯಿತೇ? ನಮಗೆ ಬರೆಯಿರಿ.
