ಈಗ ಕೆಂಡಸಂಪಿಗೆಯಲ್ಲಿ ದಿನಕ್ಕೊಂದು ಕವಿತೆ ಕಂಗೊಳಿಸುತ್ತಿದೆ. ಕನ್ನಡದ ತರತರದ ಕವಿತೆಗಳನ್ನು ಪ್ರತಿನಿತ್ಯ ನಿಮ್ಮ ಕಣ್ಣೆದುರಿಗೆ ತರುವುದು ನಮ್ಮ ಆಶಯ. ಪಂಥ, ಪ್ರಾಕಾರಗಳ ಹಂಗಿಲ್ಲದೆ ಚೆಂದವಿರುವ ಕವಿತೆಯೊಂದು ಪ್ರತಿನಿತ್ಯ ನಿಮ್ಮ ಬಳಿ ಬರುತ್ತಿದೆ. ಕನ್ನಡದ ಕವಿತೆಗಳ ಜೊತೆಗೆ ಇತರ ಭಾಷೆಗಳಿಂದ ಅನುವಾದಗೊಳ್ಳುವ ಕವಿತೆಗಳೂ ಇಲ್ಲಿರುತ್ತವೆ. ಕೆಂಡಸಂಪಿಗೆ ಪರದೆಯ ಎಡ ತುದಿಯಲ್ಲಿ ದಿನದ ಕವಿತೆ ವಿಭಾಗದಲ್ಲಿ ನೀವು ಈ ಕವಿತೆಗಳನ್ನು ಓದಬಹುದು. ಕವಿಗಳು, ಕವಿತೆಗಳನ್ನು ಇಷ್ಟಪಟ್ಟು ಅನುವಾದಿಸಿದವರು ತಮ್ಮ ಬರಹಗಳನ್ನು ಇ-ಮೇಲ್ ಮೂಲಕ ನಮಗೆ ಕಳುಹಿಸಬಹುದು. ಜೊತೆಗೆ ನಿಮ್ಮದೊಂದು ಭಾವಚಿತ್ರ ಹಾಗೂ ಸಣ್ಣ ಪರಿಚಯವೂ ಇರಲಿ. ದಿನಕ್ಕೊಂದು ಕವಿತೆಯ ಈ ದಿನ ಕವಿತೆ ಬರೆದವರು ಶಾಂತಲ ಭಂಡಿ.

ಹಿಂಬಾಗಿಲ ಮೆಟ್ಟಿಲು
 
ಹಿಂಬಾಗಿಲಿನ ಮೆಟ್ಟಿಲಲಿ
ಕುಳಿತ ಹಳೆಯ ಕಲ್ಲು
ಮಾತಾಡದಿದ್ದರೂ ಸರಿಯೇ
ಆಪ್ತಗೆಳೆಯ
 
ಮುಷ್ಠಿಯೊಳಗೆ ಕನಸಿನಅಕ್ಕಿ
ಚಿಲಿಪಿಲಿಗಳೆಲ್ಲ ಬಂದವು
ನೆನಪಿನ ಗುಬ್ಬಿ ಕನಸುಗಳ
ಹೆಕ್ಕಿ ಹೆಕ್ಕಿ ತಿನ್ನುತ್ತಿತ್ತು
 
ಸವೆದ ಹಳೆಹಾದಿಯಲಿ 
ಹೆಜ್ಜೆ ಹಾಕುವಾಗೆಲ್ಲ
ಹಳೆಯ ಚಪ್ಪಲಿಯಲಿರುವ ಹಿತ
ಹೊಸದರಲಿಲ್ಲ
 
ಹಳೆಯ ಕರ್ಚೀಫ್ ನ
ಪ್ರತಿ ಮಡಿಕೆ ಬಿಚ್ಚಿದಂತೆ
ಹೊಸ ಹೊಸದೇ ಘಮ
ವಸಂತ ಗ್ರೀಷ್ಮ
 
ಕನಸುಗಳ ಒಣಹಾಕಿ
ಆರಿದವುಗಳ ಮಡಿಸಿಡುವಷ್ಟರಲ್ಲಿ
ಅಗೋ ಗಾಳಿ ಹಾರಿಸಿತು ಅರ್ಧ
ಇನ್ನರ್ಧವ ನೆನಪ ಕಾಗೆ ಕುಕ್ಕುತ್ತಲಿದೆ
 
ಹಿಂಬಾಗಿಲಿನ ಹಳೆಯ ಕಲ್ಲು ಹೇಳುತ್ತಿದೆ
ಕನಸುಗಳು ನುಗ್ಗುತ್ತಿವೆ ಮುಂಬಾಗಿಲಲಿ
ನುಗ್ಗುವ ಕನಸುಗಳ ತಡೆದು ನಿಲ್ಲಿಸು
ನೆನಪುಗಳು ನಿಂತಿದ್ದಾವೆ ಮಚ್ಚುಹಿಡಿದು
 
ಸೋರುವುದಕ್ಕೆ ಸೂರಂಚೇ ಬೇಕಿಲ್ಲ
ಗುಡಿಸಲೂ ಸೋರುತ್ತದೆ
ಅಷ್ಟಗಲದಾಗಸವೇ ಸೋರುತ್ತಿರುವಾಗ
ಗುಡಿಸಲಿಗೆ ಸೋಗೆ ತರುವುದೆಲ್ಲಿಂದ?
 
-ಶಾಂತಲಾ ಭಂಡಿ