ಯಾಕೋ ಡಲ್ಲಾದಂತಿರುವ ಮುಖ್ಯಮಂತ್ರಿ ಯಡಿಯೂರಪ್ಪನವರು ಬೀದರಿಗೆ ಬಂದಿದ್ದರು. '

ಹಳ್ಳಿಯೆಡೆಗೆ ಮುಖ್ಯಮಂತ್ರಿಗಳ ನಡಿಗೆ', 'ಸಾವಯವ ಕೃಷಿಕ ಅಂಗಳದಲ್ಲಿ ಸಂವಾದ' ಕೇಳಲು ಎಷ್ಟೊಂದು ಚೆನ್ನಾಗಿವೆ. ಹವಾನಿಯಂತ್ರಿತ ಕೋಣೆಗಳಲ್ಲಿ ಕುಳಿತು ಇದನ್ನು ಬರೆದುಕೊಟ್ಟ ಮಹಾನ್ 'ಸಾಹಿತಿ'ಗಳ ವದನಾರವಿಂದ ನೋಡಬೇಕು ಅನ್ನಿಸುತ್ತದೆ.

ಮಹಾರಾಷ್ಟ್ರದ ಬ್ಯಾರೇಜುಗಳಿಂದ ಮನಸೋ ಇಚ್ಛೆ ನೀರು ಬಿಟ್ಟದ್ದರಿಂದ ಹತ್ತಾರು ಸಾವಿರ ಎಕರೆ ಜಮೀನಿನಲ್ಲಿ ನೀರು ನಿಂತು ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲ ಎಂದು ಹಳಹಳಿಸುತ್ತಿರುವ ದಿನಗಳಲ್ಲಿ ಮುಖ್ಯಮಂತ್ರಿಗಳ ಭೇಟಿ ಸಹಜವಾಗಿಯೇ ಆಸೆ ಹುಟ್ಟಿಸಿತ್ತು. ಕಳೆದ ಹತ್ತು ವರ್ಷಗಳ ಅವಧಿಯಲ್ಲಿ ಮುಂಗಾರು ಹಂಗಾಮಿನಲ್ಲಿ ಈ ಬಾರಿಯಷ್ಟು ಸಕಾಲಿಕ ಮಳೆ ಆಗಿರಲಿಲ್ಲ. ಜೂನ್ ಮಧ್ಯದಿಂದ ಮಳೆ ಸುರಿಯ ತೊಡಗಿದ್ದರಿಂದ ಹೊಲದಲ್ಲಿ ಹೆಸರು, ಉದ್ದು, ತೊಗರಿ ಬೆಳೆಗಳು ಹಸಿರಾಗಿ ಕಣ್ಮನ ತಣಿಸುವಂತೆ ಬೆಳೆದಿದ್ದವು. ರೈತರ ಮನದಲ್ಲಿ ಆಸೆ ಮೂಡಿಸಿದ್ದವು. ಇದ್ದಕ್ಕಿದ್ದಂತೆ ಸುರಿದ ಮಳೆ ರೈತರಿಗೆ ಶನಿಯಾಯಿತು. ಹಾಗೆ ಮಳೆ ಸುರಿದದ್ದು ಕರ್ನಾಟಕದಲ್ಲಿ ಅಲ್ಲ, ಮಹಾರಾಷ್ಟ್ರದಲ್ಲಿ. ಬ್ಯಾರೆಜ್ ತುಂಬುವವರೆಗೂ ನೀರು ಸಂಗ್ರಹಿಸಿಟ್ಟುಕೊಳ್ಳುವ ಮಹಾರಾಷ್ಟ್ರಿಗರು ಇದ್ದಕ್ಕಿದ್ದಂತೆ ಅಂದರೆ ಯಾವುದೇ ಮುನ್ಸೂಚನೆ ಇಲ್ಲದೇ ನೀರು ಬಿಟ್ಟರು. ಗೋದಾವರಿ ನದಿಯ ಉಪನದಿ ಮಾಂಜ್ರಾ ತುಂಬಿ ಹರಿದದ್ದರಿಂದ ಸಾವಿರಾರು ಎಕರೆ ಕೃಷಿ ಜಮೀನು ಬೆಳೆದು ನಿಂತ ಬೆಳೆಯೊಂದಿಗೇ ನೀರು ಪಾಲಾಯಿತು. ಅದರ ನಷ್ಟ ಲೆಕ್ಕಾಚಾರ ಮಾಡುವ ಮುನ್ನವೇ ಮಾಂಜ್ರಾ ನದಿಯ ಉಪನದಿ 'ದೇವನಾಲಾ'ದಿಂದ ನೀರು ಹರಿದದ್ದರಿಂದ ಜನ ಸಂಕಷ್ಟಕ್ಕೆ ಸಿಲುಕಿದರು. ಸಮಸ್ಯೆಯನ್ನು ಕೇಳಿ ಅರಿಯುವುದಕ್ಕೂ ಪುರುಸೊತ್ತಿಲ್ಲದ ಮುಖ್ಯಮಂತ್ರಿಗಳು 'ಪರಿಹಾರ ನೀಡುವ ಸಮಯ ಇದಲ್ಲ' ಎಂದು ಪ್ರಕಟಿಸಿಬಿಟ್ಟರು. ಕಳೆದ ಸಾಲಿನಲ್ಲಿ 'ಬರ' ಬಂದಾಗ ಬಂದಿದ್ದ ಸಿಎಂ ಸಾಹೇಬರು ಎಕರೆ ಎರಡು ಸಾವಿರ ಪರಿಹಾರ...