ಅಲೆದಿದ್ದೆ ನಾ ಒಂಟಿ ಮೋಡದಂತೆ

(ಮೂಲ: ವಿಲಿಯಮ್ ವರ್ಡ್ಸವರ್ಥ್ I Wandered As A Lonely Cloud)

ಅಲೆದಿದ್ದೆ ಅಂದು ನಾನೊಬ್ಬನೇ
ಗಿರಿದರಿಗಳ ಮೇಲೆ ತೇಲುವ ಒಂಟಿ ಮೋಡದಂತೆ
ಕಣ್ಸೆಳೆದವು ಒಮ್ಮಿಂದೊಮ್ಮೇನೇ
ಹೊನ್ನ ಬಣ್ಣದ ಡ್ಯಾಫೋಡಿಲ್ ಗಳ ಸಂತೆ
ಕೆರೆಯ ಬದಿ, ಮರಗಳ ನೆರಳಿನಲಿ
ಕಂಪಿಸಿ ಕುಣಿದಿದ್ದವವು ತಂಗಾಳಿಯಲಿ

ಅನಂತಾನಂತ ಹೊಳೆಯುತ ಮಿನುಗಿದಂತೆ
ನಕ್ಷತ್ರಗಳು ಆಕಾಶ ಗಂಗೆಯಲಿ
ಹರಡಿದ್ದವವು ಕೊನೆಯಿಲ್ಲದ ಸರತಿಯಂತೆ
ಆ ದಡದ ಅಂಚಿನ ಬದಿಯಲಿ,
ಕಣ್ಣೋಟದ ಚೀಲಗಳ ತೆರೆ-ತೆರೆದುಕೊಂಡೆ
ತಲೆದೂಗಿ ನಲಿನಲಿವ ಸಾವಿರ ಹೂಗಳ ತುಂಬಿಕೊಂಡೆ

ನರ್ತಿಸಿದ್ದವು ನೀರಲೆಗಳು ಹೂ ಸ್ಪರ್ಶದಲಿ
ಆದರೂ ಗೆಲುವು ಆ ಹೂವಿಗೆ ಮೆರುಗಿನಲಿ
ಹರುಷವಲ್ಲದೆ ಇನ್ನೇನು ಆ ಸಮಯದಲಿ
ಕವಿಹೃದಯಕೆ ಸಮರಸ ಈ ಸ್ನೇಹದಲಿ
ಮೈಮರೆತು ನೋಡಿದೆ. ನೋಡುತ್ತಲೇ ಇದ್ದೆ
ಆ ದರುಶನದ ಸಿರಿಯನ್ನ ನನ್ನದಾಗಿಸಿಕೊಂಡಿದ್ದೆ:

ನಾನೀಗಾಗಾಗ ಒಬ್ಬನೇ ಗಹನ ಮನದಲಿ
ಇಲ್ಲಾ ಹಗುರ ಶೂನ್ಯದಲಿ ಕುಳಿತಾಗ
ಕಣ್ತುಂಬಿದ ಆ ಹೂಗಳ ಹೊನಲು ಮನದಂಗಳದಲಿ
ಏಕಾಂತದ ಸ್ವರ್ಗ – ಆ ಸುಂದರ ಜಾಗ;
ನನ್ನ ಹೃದಯದೊಳಾಗ ಸಂತಸವು ತುಂಬಿ,
ನಾನಾಗುವೆ ಡ್ಯಾಫೋಡಿಲ್‌ ಗಳ ಜೊತೆ ಕುಣಿವ ದುಂಬಿ

ಮುರಳಿ ಹತ್ವಾರ್ ಹಾರ್ಮೋನು- ವೈದ್ಯ (ಎಂಡೋಕ್ರಿನಾಲಜಿಸ್ಟ್)ರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.
ಕೆಲಸ ಮತ್ತು ವಾಸ ಲಂಡನ್ನಿನಲ್ಲಿ.
ಕನ್ನಡದಲ್ಲಿ ಬರೆಯುವುದು ಜೊತೆಗೆ ಕ್ಯಾಮೆರಾ ಕಣ್ಣಿನಲ್ಲಿ ಸುತ್ತಲ ಜಗತ್ತನ್ನು ನೋಡುವುದು ಇವರ ಹವ್ಯಾಸ.

ಕೆಂಡಸಂಪಿಗೆ

ಕೆಂಡಸಂಪಿಗೆ ಸಂಪಾದಕೀಯ ತಂಡದ ಆಶಯ ಬರಹಗಳು ಇಲ್ಲಿರುತ್ತವೆ