ಜಿಜ್ಞಾಸುವಿನ ಸ್ವಗತ

ಈ ನಟ್ಟಿರುಳಿನಲ್ಲಿ
ಏನನ್ನು ಬರೆಯಲಿ?
ಸರಿದ ಮುಂಜಾವಿನ ತಂಪು
ನಡುಮಧ್ಯಾಹ್ನದ ತಾಪ
ಮುಸ್ಸಂಜೆಯ
ಮತ್ತದೇ ತಂಪು, ಕೆಂಪು?

ಈ ನಡುವಯಸ್ಸಿನಲ್ಲಿ
ಬರೆಯಲಿ ಏನನ್ನು?
ಎಳೆಹೆಜ್ಜೆಗಳಿಗೆ
ಮೆತ್ತಿಕೊಂಡ
ನನ್ನೂರ ಎರೆಮಣ್ಣು,
ಹದಿವಯಸು
ಕಚ್ಚಿ ತಿಂದ ಹುಳಿಮಾವು,
ಈಗ ಈಗಷ್ಟೇ
ಮಲಗುವ‌ ಮುನ್ನ
ದಿಂಬಿನ ಪಕ್ಕವಿರಿಸಿದ
ಓದುಗಾಜು?

ಏನನ್ನು ದಾಖಲಿಸಲಿ
ಅಳಿಸಿ ಹೋಗುವ ಈ ಬದುಕಿನಲ್ಲಿ?
ಅರ್ಧ ಕರಗಿ
ಉಳಿದರ್ಧ ಉಳಿದ ಶಾಯಿಯಲ್ಲಿ,
ಅರ್ಧಕ್ಕರ್ಧ ಸವೆದು ಹೋದ
ಲೇಖನಿಯ ಮೊನೆಯಲ್ಲಿ
ಬರೆಯಲಿ ಯಾವ ಪುರುಷಾರ್ಥಕೆ?

ಹೇಳಿ ಏನನ್ನು ಬರೆಯಲಿ?
ಹಿಂದೆ ಗವ್ವೆನ್ನುವ ಕತ್ತಲು
ಮುಂದೆ ಮಾಸಲು ಮಾಸಲು ಮಂಜು
ನಡುಹಗಲಿನ
ಈ ಮಾಯದ ಬಿಂದುವಿನಲ್ಲಿ
ದ್ವಂದ್ವ, ಜಿಜ್ಞಾಸೆ
ಅತೃಪ್ತಿ, ಅಸಹನೆ
ತವಕ, ತಪನೆ

ಬರೆಯಲಿ ಏನನ್ನು
ಈ ಅಂತಂತ್ರ ಸಂದಿಗ್ಧದಲ್ಲಿ?
ಅರ್ಧ ಉರಿದ ಅರ್ಧ ಉಳಿದ
ಯಃಕಶ್ಚಿತ್
ಹೃದಯವ ನೆಚ್ಚಿಕೊಂಡು?

ಕೆಂಡಸಂಪಿಗೆ

ಕೆಂಡಸಂಪಿಗೆ ಸಂಪಾದಕೀಯ ತಂಡದ ಆಶಯ ಬರಹಗಳು ಇಲ್ಲಿರುತ್ತವೆ