ದಡ ತಲುಪಲಿ

ರೇಖೆಗಳನ್ನು ಬಿಡಿಸುತ್ತಿರುವೆ
ತೋಚಿದಂತೆ ಗೀಚಿದಂತೆ
ಬೇಕಾದ ಆಕಾರಗಳು
ಮೂಡುತ್ತವೆಯೋ ಬಿಡುತ್ತವೆಯೋ
ಅದರ ಹಂಗು ಯಾರಿಗಿದೆ
ಎಲ್ಲ ತೊರೆದಾದ ಮೇಲೆ
ನಿರೀಕ್ಷಿಸಿಯೇ ಇರದ
ಚಿತ್ರ ಚಿತ್ತಾರಗಳು
ಧುತ್ತನೆ ಎದುರಾಗಬಹುದೋ
ಮೈಮರೆಸಿ ದಾರಿ ತಪ್ಪಿಸಬಹುದೋ!

ಪುಟಗಳು ಮುಗಿವವರೆಗೆ
ಪೆನ್ನಿನ ಶಾಯಿ ತೀರುವವರೆಗೆ
ಇರುಳು ಕೊನೆಗೊಳ್ಳುವವರೆಗೆ
ನೆರಳು ಬೆಳಕುಗಳ ಕೊರೆದು
ಮೌನ ತೀರವ ಗುರುತಿಸುವಾಸೆ

ನಿರ್ಜನ ರಾತ್ರಿಯುದ್ದಕ್ಕೂ
ನದಿ ಸಾಗರ ಕೊಳ್ಳಗಳು
ಕಾಡು ಕಣಿವೆ ಕರಿ ಮೋಡಗಳು
ಮಳೆಮಾರುತ ಹಿಮಪ್ರವಾಹಗಳು
ಬಡಿ ಬಡಿದು ಅಪ್ಪಳಿಸಿ
ಆಸೆಗಳ ಕುಡಿದುಬಿಡಲಿ
ರೇಖೆಗಳು ಚದುರಿ
ಬಿಂದುಗಳಾಗಿ ಸೀಳಿ
ದಡ ತಲುಪಲಿ!