ಕೊಳಲಾಗುವುದೆಂದರೆ…
ಸಾಮಾನ್ಯ ಬಿದಿರೊಂದು
ಕೊಳಲಾಗುವುದೆಂದರೆ-
ಹಿಂದಿದ್ದವರ ಹಿಂದೆಯೇ ಉಳಿಸಿ
ಮುಂದಿದ್ದವರಿಗಿಂತಲೂ ಮುಂದಕ್ಕೆ ಚಲಿಸಿ
ಮಂದೆಯಲೊಂದಾಗದ ಮುಂದುಗಾರನಾಗಿ
ಮುಂದೆ ಮುಂದೆ ಬರುವುದು
ಕಾಡಿನ ಮಡಿಲಲ್ಲಿದ್ದ
ಅನಾಥ ಮಗುವೊಂದು
ರಸಿಕನ ಕೈಯ್ಯ
ತೆಕ್ಕೆಯನ್ನು ಸೇರುವುದು
ಸೀಳುವ ಆಯುಧಕ್ಕೂ ಮುತ್ತಿಟ್ಟು
ರಂಧ್ರ ಕೊರೆದರೂ ನೋಯದೆ
ಎಲ್ಲವನ್ನೂ ಒಪ್ಪಿಕೊಳ್ಳುವುದು;
ಅಪ್ಪಿಕೊಳ್ಳುವುದು
ನಾಭಿಯಿಂದೆದ್ದ ಪರಿದ್ರೋಣ ಕಂಪಿತ ನಾದತರಂಗ
ಕಲಾರಸಿಕರ ಹೃದಯ ತಲುಪುವವರೆಗೂ
ಉಸಿರಾಡುವುದು;
ಜೀವಂತವಾಗಿರುವುದು
ವಿಶ್ವನಾಥ ನೇರಳಕಟ್ಟೆ ಮೂಲತಃ ದಕ್ಷಿಣ ಕನ್ನಡದ ಬಂಟ್ವಾಳದವರು. ಬಂಟ್ವಾಳದ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಕನ್ನಡ ಉಪನ್ಯಾಸಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಮೊದಲ ತೊದಲು (ಕವನ ಸಂಕಲನ), ಕಪ್ಪು-ಬಿಳುಪು (ಕಥಾ ಸಂಕಲನ), ಹರೆಯದ ಕೆರೆತಗಳು (ಚುಟುಕು ಸಂಕಲನ), ಸಾವಿರದ ಮೇಲೆ (ನಾಟಕ) ಇವರ ಪ್ರಕಟಿತ ಕೃತಿಗಳು. “ಡಾ. ನಾ ಮೊಗಸಾಲೆಯವರ ಸಾಹಿತ್ಯದಲ್ಲಿ ಪ್ರಾದೇಶಿಕತೆ” ವಿಷಯದಲ್ಲಿ ಪಿಎಚ್.ಡಿ. ಸಂಶೋಧನೆ ಮಾಡಿದ್ದಾರೆ.
Loading ...
