ಕೊಟ್ಟುಬಿಡು ಹೂವೊಂದನು…
ಈ ಹರಿಯುತಿಹ ನೆತ್ತರಿನ ಹೊಳೆಯಲ್ಲಿ
ತುಸುವೂ ತೋಯದ
ತನ್ನೊಳಗೇ ಬಚ್ಚಿಟ್ಟುಕೊಂಡ ಬೆಳಕಲಿ
ಅರಳಿದ ಹೂವೊಂದನ್ನು ಕೊಟ್ಟುಬಿಡು ನನಗೆ
ಹತ್ತಿಯಂಥಾ ಬೆಳ್ಳನೆಯ ಹಿಮದ ಹನಿಗಳಲಿ
ಮಿಂದು ಬಿರಿದ
ಬೇರಿನೊಳಗಣ ಪರಿಮಳವ ಹೊತ್ತ
ಒಂದು ಹೂವನ್ನು ಕೊಟ್ಟುಬಿಡು ನನಗೆ
ಈ ಬೆಳಗಿನ ಮೌನಗರ್ಭವ ಸೀಳಿ
ಒಂದು ಚೆಂದನೆಯ ಆಲಾಪದ
ನಾದಕ್ಕೆ ಬಾಗುವಂತಹ
ಹೂವೊಂದನ್ನು ಕೊಟ್ಟುಬಿಡು ನನಗೆ
ಎಂದೂ ಮುಗಿಯದ ಹಾದಿಯ ತಿರುವಿನ ಪಥಿಕನೇ
ನಿನ್ನ ವಿಷದ ಬಟ್ಟಲಿನಲ್ಲದ್ದಿದ
ಗುಲ್ಕುಂದದ ಸಿಹಿ ನನ್ನ ಆವರಿಸುವುದಕ್ಕಿಂತ ಮುಂಚೆ
ದಯಪಾಲಿಸು ನನ್ನೇ ನಾ ಮರೆಯುವ
ಅಮಲಿನಂತಹ ಹೂವ ಪರಿಮಳವನ್ನು
ಪತ್ರಕರ್ತೆ, ಕವಯತ್ರಿ, ಊರು ಉತ್ತರ ಕನ್ನಡ ಜಿಲ್ಲೆಯ ಸಿದ್ದಾಪುರ. ಈಗ ಬೆಂಗಳೂರಿನಲ್ಲಿ ವಾಸ. ಮೊದಲ ಪತ್ನಿಯ ದುಗುಡ (ಸಿನಿಮಾದಲ್ಲಿನ ಮಹಿಳಾ ಪಾತ್ರಗಳ ವಿಶ್ಲೇಷಣೆ), ಸೀತಾಳೆ ದಂಡೆಯ ಸದ್ದಿಲ್ಲದ ಕಥೆಗಳು(ಕಥಾ ಸಂಕಲನ), ಮಣ್ಣಿನ ಗೆಳತಿ(ಕೃಷಿ ಮಹಿಳೆಯರ ಅನುಭವ ಕಥನ)ಪುಸ್ತಕಗಳು ಪ್ರಕಟವಾಗಿವೆ.
